Wučerjo serbšćiny trěbni
Publikováno: 23.2.2014
Slepo. Hižo wot šulskeho lěta 2000/2001 w Slepom po koncepciji 2plus dźěłaja. „Započatki běchu dosć ćežke. Za nas bě to nowosć. Na přeće staršich smy koncept zawjedli", wuswětla wučerka za serbšćinu w rjadowni 2a Silwija Zajcowa. Tehdy je wona z wosom šulerjemi započała. Šěsć dźěći bě Rownjansku pěstowarnju Milenka wopytało, jedne bě z Dźěwina, dalše ze Slepjanskeje pěstowarnje. Tehdy njemějachu na šuli hišće žane nazhonjenja. Tež knihi za wuwučowanje po koncepciji 2plus pobrachowachu. „Smy so na wučbnicach A-serbšćiny za maćernorěčnych šulerjow orientowali", so Silwija Zajcowa dopomina.
Dźensa wuknje serbsku rěč w 1. lětniku sydomnaće dźěći pola Heiki Eckertoweje a Petry Rübesamoweje, w 2. lětniku 18 dźěći pola Silwije Zajcoweje a Kerstin Stürmeroweje, w 3. lětniku 19 dźěći pola Kathrin Jansenoweje a Petry Rübesamoweje a w 4. lětniku dźesać pola Heiki Eckertoweje. „Projekt je kruće zakótwjeny a w nim tči wysoka rěčna kwalita", praji šulska nawodnica Petra Rübesamowa. Rěčne rjadownje docpěwaja runje tak dobre wuslědki w pisomnym powědanju a w čitanskej kompetency kaž jich paralelne rjadownje. Dalši facit pak je: Wysoki zaměr, zo Slepjanscy šulerjo z koncepciju 2plus serbski maćernorěčny niwow docpěja, njeje zwoprawdźomny. Za to pak zdobywaja sej solidne znajomosće serbskeje rěče.
„Zo by so kwalita dlěšodobnje zawěsćiła, trjebamy nuznje dalšich młodych motiwowanych wučerjow serbšćiny. W idealnym padźe bychu to byli maćernorěčni Serbja, horjacy so za Slepjanski region", praji šulska nawodnica. Za wobohaćacy ma wona serbskorěčny cyłodnjowski poskitk dźiwadło, kotryž Serbowka Juliana Kaulfürstowa nawjeduje. „Dźensa móžemy rjec, zo ličba šulerjow ze zajimom po koncepciji 2plus wuknyć, lěto wob lěto přiběra. Něhdźe połojca našich šulerjow so na serbšćinje wobdźěla, zdźěla samo wjace", potwjerdźa Silwija Zajcowa. W rjadowni 2a su to lětsa samo wšitcy wosomnaćo. Cyłkownje wuknje tele šulske lěto w Slepom 64 dźěći serbšćinu po koncepciji 2plus a 35 dalšich jako cuzu rěč. „Hdyž jónu serbsce rěčiš, njemóžeš z tym hižo přestać. Njejsy potom hižo w swojej rěči", měni wosomlětna Lara Pawlikec ze Slepoho. Hordźe powěda wona wo tamnišim Serbskim dźěćacym a młodźinskim ansamblu, hdźež wuknje spěwać a rejwać. Tež to w njej zajim za rěč wubudźa. „Kusk sym serbsku rěč hižo w pěstowarni nawuknyła", rozprawja dźewjećlětna Alexa Mäkelburgec z Trjebina. „Serbšćina mi při tym pomha dorozumić so z ludźimi, kotřiž druhu słowjansku rěč rěča nałožuja." (AK)
Serbske Nowiny 22.2.2014